O Concello de Barbadás pide a colaboración da veciñanza para mellorar as cifras de reciclaxe no municipio, que actualmente se atopan moi por debaixo da media galega. O alcalde, Xosé Carlos Valcárcel, e o tenente alcalde, Daniel Rey, chaman á concienciación ambiental da poboación e recordan a importancia de utilizar diferentes contedores segundo o tipo de residuo. “Canto maior é a reciclaxe, menor é o gasto para o Concello e menor é o recibo do lixo”, recalcou onte o alcalde, Xosé Carlos Valcárcel, durante o pleno ordinario de abril.
No punto 2 da sesión, o pleno aprobou por unanimidade a adhesión do Concello ao Convenio marco de colaboración entre a Consellería de Medio Ambiente e Cambio Climático da Xunta e os Sistemas de responsabilidade ampliada de residuos de envases domésticos de envases lixeiros e papel e cartón dun só uso. Daniel Rey explicou que se trata dun convenio marco con Ecoembes para todos os municipios galegos e as catro deputacións, e aproveitou a ocasión para lamentar a baixa taxa de reciclaxe de Barbadás. “Actualmente, estanse a recoller 13,5 kg de envases lixeiros por habitante, un 15% que a media galega, e 9 kg de papel e cartón por habitante, un 50% menos que os datos a nivel galego”, sinalou Rey, quen non negou a súa decepción coas cifras.
O alcalde recordou que estes baixos porcentaxes repercuten na vida cotiá da veciñanza. “A Xunta de Galicia cóbranos en función da tonelaxe que levamos a Sogama, se a reducimos ou incrementamos, custará máis ou menos. Se hai máis tonelaxe, non reduciremos o que destinamos á reciclaxe e non reduciremos o importe do lixo”, indicou.
Nesta liña, o goberno municipal avanzou novas campañas de concienciación dirixidas á poboación, que se porán en marcha nas próximas semanas, así como a colocación de novos autocolantes nos contedores para informar sobre a correcta reciclaxe e xestión de residuos de gran tamaño.
