O grupo provincial do BNG na Deputación de Ourense mostrou a súa satisfacción tras coñecer que a Xunta de Galicia comeza a dar pasos para mellorar o transporte público entre Celanova, a Baixa Limia e Ourense. Aínda que consideran que son avances pequenos, os nacionalistas valoran que se estean a atender algunhas das demandas que levan meses reclamando, tanto nas institucións como nas rúas.
Desde o BNG lembran que en decembro de 2024 presentaron unha moción na Deputación alertando do aillamento que sofren estas comarcas, e esixindo medidas urxentes para garantir un servizo de transporte público que sexa útil, digno e adaptado aos horarios e necesidades reais da veciñanza.
Tamén destacan o traballo da organización xuvenil Galiza Nova, que impulsou unha campaña de recollida de sinaturas nos concellos afectados e fixo chegar directamente á Xunta as súas propostas. Esta campaña serviu para visibilizar un problema que levaba anos esquecido.
«A falta de transporte público fai moi difícil ir ao médico, estudar ou traballar sen coche propio», explican desde o BNG, que recoñece como positiva a medida anunciada pola Xunta, pero insiste en que segue sendo insuficiente. Piden unha solución global para un sistema de transporte que non funciona ben nestas zonas.
Finalmente, o BNG comprométese a seguir loitando, tanto desde a Deputación como xunto aos colectivos sociais, por un modelo de mobilidade máis xusto, sostible e pensado para a xente, sobre todo para a mocidade e as persoas maiores.
