O Concello de Sandiás conmemora o 8 de marzo, Día Internacional da Muller, cun amplo programa de actividades que se desenvolverá ao longo de todo o mes baixo o obxectivo de sensibilizar, visibilizar e promover unha sociedade máis xusta e igualitaria. Ano tras ano, o consistorio impulsa iniciativas dirixidas a toda a veciñanza, consolidando o seu compromiso coa igualdade real entre mulleres e homes.
A programación arrincará coa lectura do Manifesto pola Igualdade da FEGAM, centrado no papel das mulleres como xestoras do cambio e axentes fundamentais na transformación social.
Entre as accións formativas destaca o curso “Discapacidade, muller e violencia”, organizado pola Federación Española de Municipios y Provincias a través do Campus de Violencia de Xénero. A actividade desenvolverase entre o 23 de marzo e o 17 de maio de 2026, afondando na análise das múltiples discriminacións que afectan ás mulleres con discapacidade e na necesidade de ofrecer respostas institucionais eficaces.
A creatividade tamén terá un papel protagonista co obradoiro “Estoxos pola Igualdade”, organizado no marco do Pacto de Estado contra la Violencia de Género. A actividade celebrarase o venres 6 de marzo, de 12.30 a 14.30 horas, no Local Social da Casa de Cultura de Sandiás, promovendo a reflexión a través da expresión artística.
No ámbito cultural e familiar, as actividades da Furgoteca Ourense-Sur Occidental incluirán a proposta “Sementar en feminino” e “Poemas coloridos”, unha homenaxe á escritora Rosalía de Castro dirixida a crianzas e familias do Punto de Atención Infantil. Esta sesión terá lugar o 18 de marzo, de 16.30 a 17.30 horas, na Casa de Cultura.
Precisamente no Punto de Atención Infantil de Sandiás desenvolverase tamén a iniciativa “As mamás ensínannos”, na que as nais compartirán cos cativos actividades cotiás do seu día a día, poñendo en valor o traballo e os saberes femininos.
Pola súa banda, o CEIP de Sandiás acollerá durante o mes de marzo a actividade “8M: As nosas Mulleres”, organizada polo CDR O Viso, coa finalidade de recoñecer e visibilizar o papel das mulleres na contorna máis próxima.
Con este conxunto de propostas, o Concello de Sandiás reafirma o seu compromiso coa igualdade e coa construción dun futuro no que a equidade, o respecto e a inclusión sexan piares fundamentais da convivencia.
