Ribadavia agarda este fin de semana a cuarta edición da Feira Revive, pioneira en Galicia na supra reciclaxe e consumo consciente. A Igrexa da Madalena acollerá as súas actividades este 17 e 18 de maio, cun horario ininterrompido de 10.00 a 22.00h.
Nesta ocasión, por vez primeira, a feira desenvolverase dous días, non un como ata o momento; respondendo á boa evolución desta actividade nos últimos anos e ás propias petición de expositores e visitantes, que cada ano se achegan desde diferentes puntos de Galicia para formar parte desta experiencia transformadora.
A Feira Revive “busca ser un proxecto xerador de conciencia ambiental, promovendo un modelo de vida máis ecolóxico, sustentable e comprometido coa reutilización de recursos”, explica Carolina Atuesta, á fronte da dirección desta Feira.
Esta edición contará con 30 expositores que presentarán produtos elaborados a partir de materiais reciclados e materias primas recuperadas, desde a artesanía, produtos gastronómicos ou propostas innovadoras de deseño sostible.
A programación inclúe tamén unha ampla axenda cultural, diversa e para todos os públicos, con obradoiros, charlas, sesión musicais… O sábado 17 de maio, coincidindo coa celebración do Día das Letras Galegas, terán lugar varias actividades relacionadas coa cultura galega e as propias homenaxeadas este ano, as cantareiras e transmisoras da cultura popular oral galega. Así, na Feira Revive terá lugar unha exposición de arte a cargo de A Curuxa Tola (11.00h), a actuación das Pandereteiras da Istoria (12.30h), e obradoiros como o de construción dun pandeiro vegano (17.00h) a cargo de Troula e a reciclaxe de bonecas Abayomis (18.30h) con MoiNosas. Ademais, o día pecharase cunha sesión do DJ Chemigal (19.30h), que pinchará únicamente temas de artistas galegos.
O domingo 18, as actividades arrancarán cun encontro de debuxo con modelo vivo (12.00h), coa propia Carolina Atuesta; unha proposta que xa é un clásico da feira e que convida a artistas e familias a crear xuntas. Ademais, haberá unha charla sobre autopublicación con Evelio Traba (13.00h), un Obradoiro de papel reciclado con Fabiana Marques (18.00h) e outra sesión musical de peche, desta vez, co DJ Ori Darko (20.00h).
A oferta gastronómica é outro dos atrativos da feira, con opción saudables, vexetarianas, crudiveganas, café ecolóxico e produtos do país, facendo da Feira Revive unha experiencia completa para o corpo e o espírito.
Este evento, organizado polo Concello de Ribadavia e coa colaboración doutras entidades, consolídase como unha ferramenta para a promoción da capital do Ribeiro como un exemplo de turismo consciente ao tempo que se promove un estilo de vida respectuoso co medio ambiente.
