A Federación Alcer Galicia celebrará o sábado 13 de decembro, ás 18:00 horas, a súa primeira gala solidaria “O Son de Alcer” no Auditorio Municipal de Ourense. Será un encontro aberto a toda a cidadanía, pensado especialmente para quen convive coa enfermidade renal ou sente de preto esta realidade.
Na gala participarán bandas, solistas e grupos de baile que unen talento e xenerosidade para dar visibilidade ao labor da entidade.
A recadación das entradas solidarias destinarase a manter servizos fundamentais: información, apoio social, atención psicolóxica e asesoramento nutricional en todas as delegacións galegas.
Alcer Galicia integra asociacións de A Coruña, Ferrol, Santiago, Pontevedra, Vigo, Ourense e Lugo, unidas polo mesmo obxectivo: mellorar a calidade de vida das persoas con doenza renal crónica e garantir un acceso xusto aos recursos sociosanitarios.
