Do 18 ao 26 de xullo, Ribadavia convértese, unha vez máis, no epicentro das artes escénicas coa chegada da Mostra Internacional de Teatro (MIT), que este ano celebra a súa 41ª baixo o lema “escenas en tránsito”, a nova dirección artística formada por Sabela Mendoza e Gena Baamonde, apostan pola contemporaneidade, a diversidade, a mirada feminista e os formatos híbridos. Unha programación diversa, arriscada e comprometida.
A necrópole do Castelo de Ribadavia acolleu esta mañá a presentación da MIT, na que participaron o alcalde, César Fernández; Sabela Mendoza; Gena Baamonde; Eladio Santos, subdelegado do Goberno en Ourense; Manuel Pardo, delegado territorial da Xunta na provincia, e Jacobo Sutil, director da Axencia Galega das Industrias Culturais (Agadic). César Fernández aproveitou a ocasión para poñer en valor o compromiso e esforzo da nova dirección artística, que traballa intensamente desde hai meses. “Este é un dos eventos culturais máis importantes da provincia e dos máis importantes de Galicia. Ribadavia, no verán, é a capital das artes escénicas da nosa comunidade”, resaltou. Por outra parte, destacou a cooperación institucional, que permite que cada ano a MIT siga sendo un referente como mostra teatral. O alcalde tamén agradeceu o traballo do anterior director, Roberto Pascual, quen estivo á fronte desta cita durante 15 anos.
Eladio Santos puxo énfase no prestixio da MIT e no seu papel fundamental ao “levar a cultura ao mundo rural”. Jacobo Sutil resaltou a importancia da aposta institucional pola mostra teatral de Ribadavia e sinalou o “bo facer” de Sabela Mendoza e Gena Baamonde. “Coñezo a vosa traxectoria, e quero darvos unha pública benvida, parabéns”, apuntou.
Unha programación diversa, arriscada e comprometida
Sabela Mendoza e Gena Baamonde detallaron polo miúdo a programación desta 41ª edición. Ambas destacaron a calidade das obras, así como do resto das actividades incluídas na proposta. Nesa liña, animaron á poboación a participar non só como público das representacións, senon tamén acudir aos coloquios, nos obradoiros e nos encontros abertos á cidadanía.
En total, máis de 35 actividades entre funcións, obradoiros, encontros, foros e accións abertas á comunidade, repartidas en máis dunha ducia de espazos escénicos que van desde os históricos —como o Auditorio do Castelo ou a Igrexa da Madalena— a espazos naturais, prazas e sitios máis alá do núcleo urbano, museos ou a Casa da Cultura, facendo da MIT un festival expandido.
En canto aos espectáculos escénicos, a MIT 2025 presenta 23 propostas de teatro, danza, performance, circo e artes vivas, coa participación de compañías procedentes de Galicia e o resto do Estado, ademais de compañías procedentes de Portugal, Italia e Brasil. A convivencia entre linguaxes e formatos configuran unha programación atenta á diversidade formal e temática, onde teñen cabida desde propostas intimistas ata espectáculos de gran formato, e que aborda cuestións como a memoria histórica e o seu vínculo coas historias íntimas e persoais, a identidade e o cuestionamento das fronteiras, a saúde, a disidencia, a ecoloxía ou o pensamento crítico.
A este programa de exhibición súmanse o programa de apoio á creación (con 3 residencias artísticas), o programa de formación (con 6 obradoiros e laboratorios dirixidos tanto a profesionais como a público xeral e público infantil) e o programa de mediación (co que se busca xerar outros lugares de encontro e conexión entre artistas, públicos e profesionais das artes escénicas).
Tamén nesta edición da MIT a programación galega constitúe un dos eixes centrais coa presentación de espectáculos de nove compañías galegas como son Disiden.cia, Ibuprofeno Teatro, La Guajira, Ártika, Ítaca Teatro, Pistacatro, Furia Sotelo, Chévere e o colectivo A Volátil, que se presenta por primeira vez na MIT, e a colaboración de outras tantas artistas e profesionais en diversas actividades paralelas.
No plano internacional, destaca a presenza da compañía italiana Parini Secondo co seu espectáculo HIT (out), unha vibrante performance coreográfica e musical. Desde Portugal, Circolando presenta Crátera, unha peza transdisciplinar inspirada nas xeopoéticas e na paisaxe volcánica que aposta por traer as cuestións ecolóxicas a un plano micro, o dos corpos e as relacións entre suxeitos e territorios. Tamén desde Portugal chega Patricia Portela co seu traballo de residencia e mostra en proceso Os Passadores que aborda cuestións de nacionalidade e fronteiras.
Ademais, a coreógrafa brasileira residente en Cantabria Mari Paula ofrece a súa peza Escambo, unha danza lúdica e tropical que aposta polo sensorial e o traballo cos obxectos para achegar tamén a expresión creativa ás nenas e nenos.
A programación estatal presenta proxectos novidosos e xóvenes (como a creadora María Jurado) ao tempo que trae a Ribadavia a recoñecidas compañías e creadoras (como Malpelo, Luz Arcas, Cris Blanco, Societat Doctor Alonso, Teresa Lorenzo, Luz Arcas/La Phármaco, Malpelo ou Kolektiv Lapso Cirk), poñendo o foco na escena contemporánea e na mistura de disciplinas, incluindo proxectos ubicados na performance e a arte de acción, como o que protagonizan o xa mítico dúo Los Torreznos. O humor, a expresión poética, o pensamento crítico e o compromiso político ocupan un lugar especial nesta selección estatal.
A MIT non se limita á exhibición. Ademais, incluirá 6 obradoiros e cursos abertos ao público, como o taller de clown de Roi Borrallas ou de máscara neutra de Mar Navarro, en colaboración coa Escola galega de clowns, o laboratorio El Desenterrador con Sofía Asencio e Tomás Aragay, en colaboración coa Asociación de Actores e Actrices de Galicia (AAG) ou o obradoiro de movemento para infancia a partir da peza Escambo de Mari Paula. Ademais, o ciclo satélite da mostra, leva espectáculos a aldeas como San Cristovo, Sampaio, Santo André ou Francelos, fomentando o acceso e descentralizando propostas artísticas de calidade en espazos fóra do núcleo urbano. E coma sempre, os Foros MIT ofrecerán conversas abertas coas compañías ao remate das funcións para compartir impresións co público.
Tamén nesta edición se celebrarán a 20ª edición do Premio Abrente, cun acto especial e lectura dramatizada que homenaxea o legado dunha das convocatorias de escrita teatral en lingua galega máis significativas do país. Así mesmo, a MIT acollerá a entrega do Premio da Academia Galega de Teatro a Xulio Lago, recoñecendo a súa traxectoria esencial na construcción do teatro galego contemporáneo, ademais do anuncio e entrega do Premio Abrente 2025 e dos outros premios outorgados pola MIT.
Con esta ampla proposta, a 41ª MIT reafírmase como un espazo vivo de encontro, risco, memoria e celebración que alberga de xeito destacado o traballo de creadoras, directoras e coreógrafas. Un festival que acolle corpos diversos, linguas múltiples, públicos interxeracionais e unha comunidade artística que non deixa de interrogar o noso tempo e os propios xeitos de facer creación, prestando especial atención ás direccións e creacións dende colectivos e equipos que traballan dende unha ollada plural.
Toda a información sobre a MIT pode atoparse na súa web (mitribadavia.gal). A venda de abonos abrirase a partir do día 1 de xullo a 62€. As entradas individuais poderán adquirirse a partir do 7 de xullo por un prezo de 7€ a xeral e a 5€ para estudantes e persoas desempregadas; a excepción da inauguración e clausura no Castelo, cando o prezo xeral será de 10€ mentres que o reducido será de 8€.
Ademais, inclúense 10 espectáculos de acceso gratuíto engadidos a outras actividades tamén de balde, coma obradoiros e presentacións.
A MIT contará un ano máis co apoio da AGADIC (Axencia Galega das Industrias Culturais – Xunta de Galicia), a Deputación de Ourense e o Instituto Nacional de las Artes Escénicas y de la Música (INAEM) – Ministerio de Cultura; entre outros patrocinadores e apoios que fan posible unha nova edición da MIT.
